კლასიკური. სიმებიანი

ფ. მენდელსონი. სავიოლინო კონცერტი მი მინორი (e minor, e moll), op. 64. ასრულებენ: იაშა ჰეიფეცი (Jascha Heifetz, რუსეთი/აშშ) - ვიოლინო ლონდონის სამეფო ფილარმონიული ორკესტრი (Royal Philharmonic Orchestra) დირიჟორი სერ თომას ბიჩემი (Sir Thomas Beecham) ჩაწერილია: მონო; EMI Studios, ები როუდი (Abbey Road), ლონდონი. 06. 10. 1946 ფელიქს მენდელსონ ბარტოლდი (Felix Mendelssohn Bartholdy) - მე-19 საუკუნის გერმანელი კომპოზიტორი და დირიჟორი (ებრაული წარმოშობის), მუსიკალური რომანტიზმის ერთ-ერთი უდიდესი წარმომადგენელი, ლაიფციგის კონსერვატორიის დამაარსებელი. ავტორმა წინამდებარე სავიოლინო კონცერტზე მუშაობა დაიწყო 1838 წელს, მეორე რედაქცია შეიქმნა 1844 წელს. პირველად შესრულდა 1845 წელს. მენდელსონის სავიოლინო კონცერტი კლასიკური მუსიკის ერთ-ერთი ყველაზე პოპულარული და სავიოლინო რეპერტუარის ქრესტომათიული ნაწარმოებია. კონცერტი სამნაწილიანია: 1. Allegro molto appassionato (მი მინორი) 11:00 2. Andante (დო მაჟორი) 7:17 3. Allegretto non troppo — Allegro molto vivace (მი მაჟორი) 5:48 იაშა (იოსებ) ჰეიფეცი ((Я́ша Хе́йфец, Jascha Heifetz) - ებრაული წარმოშობის მე-20 საუკუნის და ყველა დროის უდიდესი მევიოლინე. დაიბადა ვილნიუსში (იმ დროს რუსეთის იმპერია). ვიოლინოზე დაკვრა დაიწყო 3 წლის ასაკიდან. მაშინვე აღიარეს ვუნდერკინდად. დაამთავრა სანკტ-პეტერბურგის კონსერვატორია. ბევრს მოგზაურობდა გასტროლებით, ჰქონდა უდიდესი წარმატებები. 1917 წლიდან გადასახლდა შეერთებულ შტატებში. პედაგოგიურ მოღვაწეობას ეწეოდა კალიფორნიის უნივერსიტეტში. მისი შესრულება გამოირჩეოდა ფანტასტიკური ტექნიკით, ულამაზესი ბგერით და ემოციური სრულყოფილებით. უკრავდა გვარნერის და სტრადივარიუსის შექმნილ ვიოლინოებზე. დასაკრავი სია: კლასიკური. სიმებიანი

ტომაზო ალბინონი (Tomaso Albinoni) - ბაროკოს ეპოქის (მე-18 ს.) იტალიელი კომპოზიტორი. მისი შემოქმედება გამოირჩევა ჟანრული მრავალფეროვნებით. თავის დროზე პოპულარული იყო, როგორც საოპერო კოპოზიტორი, თუმცა დღეს გაცილებით პოპულარულია მისი საორკესტრო და ინსტრუმენტული ნაწარმოებები. ადაჯო სოლ მინორი (Adagio sol minor, g minor, g moll) სიმებიანი ორკეტრის და ორღანისთვის - მიეწერება ალბინონის, თუმცა ნაწარმოების უდიდესი ნაწილის შემქმნელია რემო ჯაძოტო (Remo Giazotto) - მე-20 საუკუნის კომპოზიტორი და მუსიკისმცოდნე, ალბინონის ნაწარმოებების კატალოგიზატორი. ასრულებენ: სტეფან ჰაუზერი (Stjepan Hauser) - ვიოლონჩელისტი (ხორვატია) ზაგრების ფილარმონიული ორკესტრი (Zagreb Philharmonic Orchestra) დირიჟორი ივო ლიპანოვიჩი (Ivo Lipanovic, ხორვატია) გალა-კონცერტი "ჰაუზერი და მეგობრები" (Hauser & Friends). არენა პულა, ხორვატია. 24. 08. 2018 კონცერტის ფრაგმენტი არანჟირება: სტეფან ჰაუზერი, ფილიპ სლივაჩი (Hauser and Filip Sljivac) არენა პულა (Arena Pula) - რომაული ამფითეატრი ქ. პულაში (ხორვატია), აშენებული ჩვ. ერამდე 68-27 წლებში. შედის მსოფლიოში ჩვენამდე მოღწეულ 6 რომაულ ამფითეატრში. ერთადერთი, რომელსაც სრულად შემორჩა ოთხივე გვერდითი კოშკურა. დასაკრავი სია: კლასიკური. სიმებიანი

ნაწარმოები სრულდება თბილისის წმ. პანტელეიმონის ეკლესიაში, ლიანას მეუღლის, თამაზ ჩაჩავას პანაშვიდზე. 28. 08. 2017 თამაზ ჩაჩავა - ექიმი, ლიტერატორი, ჯაზმენი. წყვილი 45 წელი ცხოვრობდა ერთად. გარდაიცვალა 2017 წელს გულის შეტევით ბათუმში, ლიანა ისაკაძის დაარსებული ფესტივალის "ღამის სერენადების" მიმდინარეობისას. მისი გარდაცვალების შემდეგ ლიანამ დაასრულა საშემსრულებლო მოღვაწეობა. იოჰან სებასტიან ბახი. ჩაკონა. მეორე სოლო სავიოლინო პარტიტის ფინალი (D minor, d moll, რე მინორი). BWV 1004 (ციკლიდან "სონატები და პარტიტები სოლო ვიოლინოსთვის") შეიქმნა 1717-1720 წლებში. სავიოლინო რეპერტუარის ერთ-ერთი ყველაზე ცნობილი და ურთულესი ნაწარმოები. ლიანა ისაკაძე (02. 08. 1946 - 05. 07. 2024) - ქართველი მსოფლიო კლასის ვირტუოზი მევიოლინე, კამერული ორკესტრის დირიჟორი. შესულია მე-20 საუკუნის 2000 უდიდეს შემსრულებელთა სიაში. ახლახანს, 78 წლის ასაკში, მიიბარა მახათას მთის საზოგადო მოღვაწეთა პანთეონმა. წინამდებარე ვიდეო წამოღებულია ისრაელში საქართველოს ელჩის ლაშა ჟვანის ფეისბუქიდან თანდართული პოსტით: "Ambassador Lasha Zhvania · 07. 07. 2024 გენიოსის ამ უკანასკნელ შესრულებას სამი დღეა და ახლაც, ამ სიტყვების წერისას, განუწყვეტლივ ვუსმენ… 2017 წლის მარიამობის დღეს (28 აგვისტოს - თ. ტ.), წმინდა პანტელეიმონის ტაძრის გუმბათქვეშ დასვენებული მეუღლის ცხედართან უკიდეგანო მოთქმის და გლოვის ამოძახილის მუსიკით ზეცამდე აღყვანილს… განწირულად მომტირალს ვთხოვე, ვიოლინო აეღო და თამაზისთვის “ჩაკონა” შეესრულებინა. სრულიად უმწეო, უსუსური და უიმედო ბავშვივით უსიტყვო, გულის გამაპობელი ქვითინი შეწყვიტა, სასვენთან მივიდა და… ვინც ბოლომდე მოუსმენთ - დასასრულს ამბობს: “ვსიო” (დასრულდა), იცინის და ზურგს გვაქცევს. ეს მინიშნება იყო, რომ ჩვენი თანამედროვეობის ბუმბერაზი დიდ სცენას და მისი შემოქმედების მოყვარულთა დიდ არმიას ემშვიდობებოდა და ღვთისაგან ჯერ არ გამწესებულმა, მარადისობასთან უფრო ადრე შერწყმის სურვილით, მატერიალური სამყაროს წინაშე საკუთარი დიდი სცენის ფარდა ჩამოიფარა. ერთხელ, ვახშმისას, სიჩუმე ხანგრძლივად გავანებივრეთ და აღმოხდა: “დედა, რა კარგი იყო ეს! როგორ ვერიდებით და გვეუხერხულება სიჩუმე. მაშინ, როცა ამ დროს ყველაზე კარგად ხდება ადამიანებს შორის ენერგეტიკის გაცვლა და ურთიერთგაგება”… ამიტომ, აქ შევჩერდები - დამტირებლის გარეშე დარჩენილ, საკაცობრიო მნიშვნელობის ვირტუოზთან მრავალმეტყველებით გამომშვიდობებას მისივე შესრულებული მუსიკის მოსმენა სჯობს. თუკი კაცობრიობას ღმერთის ერთ-ერთ სინონიმად “შემოქმედი” დაგვიდგენია, არც იმის თქმა მემკრეხელება, რომ შენ ბევრისთვის სცენის და მუსიკის ღმერთი იყავი და დარჩები ჩვენს მეხსიერებაში, როგორც სცენაზე მოარული ბობოქარი ენერგია და ვირტუოზული სრულყოფილება. მადლობა, უბადლო გენიოსო, ეულო უიღბლო, წესიერო, ყრმასავით სუფთა სულის მატარებელო, კარგო ადამიანო და ერთგულო მეგობარო! მჯერა, შენს მიერ წმინდა პანტელეიმონის გუმბათში ღვთიური ნიჭით აშვებული ბგერათა წყობა დღეს დილით შენს ნაწამებ ცხედარს უკან დაებერტყება და შენს სპეტაკ სულს მარადისობაში სალბუნად გაჰყვება! მშვიდობით! სიჩუმეში მოუსმინეთ… ბოლომდე… დალოცვაც მიაყოლეთ დიდი ლიანას სულს!" დასაკრავი სია: კლასიკური. სიმებიანი