ზურაბ გურული. ჩინურ-ამერიკული კრიზისის ნარკოლოგიური ასპექტები (ფენტანილი). 18. 11. 2023

guruli
რეალობა ზურაბ გურულის თვალით. 18. 11. 2023

დარიო-რადიო - აშშ-ში მცხოვრები ემიგრანტი ქართველების დაფუძნებული მედიასაშუალება
წამყვანი თორნიკე ბერიშვილი
სტუმარი ზურაბ გურული - ამერიკაში მოღვაწე ქართველი მედიკოსი
გადაცემის ფრაგმენტი.
სრული გადაცემა:
დარიო. თორნიკე ბერიშვილი - ზურაბ გურული. დღევანდელობა. პოლიტიკური საუბრები. 18. 11. 2023
https://rumble.com/v6xltfm-.-.-.-.-18.-11.-2023.html

დამატებით:
ფბ Zurab Guruli 18. 11. 2023
ჩინურ-ამერიკული კრიზისის ნარკოლოგიური ასპექტები

ამერიკისა და ჩინეთის პრეზიდენტების შეხვედრის შედეგი ოფიციალურად ძალიან მწირი იყო. მხოლოდ ორ ასპექტზე გაკეთდა საჯარო აქცენტი:
1. ფენტანილის არალეგალური პროდუქციის აღკვეთაზე და
2. ჩინეთისა და ამერიკის შეიარაღებულ ძალებს შორის კომუნიკაციის აღდგენაზე.
გაუთვითცნობიერებელ ადამიანს ალბათ გაუკვირდება, რომ ორი გიგანტური სახელმწიფოს ლიდერის დისკუსიის მთავარი თემა ფენტანილი გახდა; მედიკამენტი, რომლის გარეშეც ვერცერთი თანამედროვე საოპერაციო ვერ იფუნქციონირებს და იმავდროულად უაღრესად საშიში და მძლავრი
ნარკოტიკი, რომლის კუსტარული უსაფრთხო დოზირებაც ძალიან ძნელია, თუ არა შეუძლებელი; მაგრამ მხოლოდ გაუთვითცნობიერებელს.
ყოველწლიურად ფენტანილი 70 ათას ადამიანს კლავს ამერიკაში; ბევრად უფრო მეტს, ვიდრე ვიეტნამში, ერაყში და ავღანეთში ერთდროულად დაღუპულების რიცხვია. ფენტანილით ამერიკას მექსიკური ნარკო-კარტელები „ამარაგებენ“, რომლებიც ამ სინთეზური პრეპარატის წარმოებისათვის საჭირო ნედლეულს ჩინეთიდან იღებენ. სწორედ ფენტანილის ნედლეულის მწარმოებელი ჩინური ლეგალური და არალეგალური კომპანიების
კონტროლი სთხოვა პრეზიდენტმა ბაიდენმა პრეზიდენტ სი ძინპინს.
რატომ გახდა ეს საკითხი განსაკუთრებით მნიშვნელოვანი ამჟამად?
ფენტანილის ეპიდემია უკვე რამდენიმე წელია ისედაც მძვინვარებს ამერიკაში. დიდი ალბათობით იმიტომ, რომ ცოტა ხანში ევროპას ემუქრება ამ იაფი და მომაკვდინებელი ნარკოტიკით წალეკვა, რაც გაცილებით უფრო მასშტაბურ მსხვერპლს გამოიწვევს. ევროპული სახელმწიფოების არალეგალურ ნარკო-ბაზარზე ფენტანილი ჯერჯერობით არ დომინირებს, მაგრამ როგორც სახელმწიფო მდივანმა ენტონი ბლინკენმა აღნიშნა თავის ევროპელ კოლეგებთან საუბრისას, სულ მალე ეს ბალანსი მკვეთრად დაირღვევა.
ევროპულ ნარკო-სამყაროში ამჟამად ჰეროინი დომინირებს; ბუნებრივი წარმოების ნარკოტიკი, რომლითაც სამყაროს გულუხვად ამარაგებდა ავღანეთი; მაგრამ თალიბანებმა მოახერხეს ოპიუმის ყაყაჩოს პლანტაციების 95%-ის განადგურება. პარალელურად, გაანადგურეს მცენარე ეფედრას ნარგავებიც, რომელიც ასევე ბუნებრივი წარმოების მეორე მძლავრი ნარკოტიკის, მეტამფეტამინის მისაღებად გამოიყენება.
შესაბამისად, ევროპულმა ნარკო-ბაზარმა უმძლავრესი დარტყმა მიიღო. ამჟამად კარტელები შენახულ მარაგებს ჰყიდიან, მაგრამ მალე იძულებულები გახდებიან, რომ ჰეროინის მცირე დოზების მოქმედების სიმძლავრის გასაზრდელად ფენტანილის მინარევები გამოიყენონ. როდესაც ეს მოხდება, დიდი ალბათობით ათიათასობით ევროპელი ახალგაზრდა დაიღუპება ზედოზირებით. მიუხედავად იმისა, რომ ტალიბანები თავიანთ მკვეთრ ნარკო-პოლიტიკას რელიგიური მოტივებით ხსნიან, საფუძვლიანი ეჭვი არსებობს, რომ ისინი ხელოვნურად ცდილობენ ჰეროინისა და ამფეტამინის მკვეთრი დეფიციტის შექმნას მსოფლიოში, რაც კატასტროფულად გაზრდის მათ ფასს. პარალელურად, ავღანეთი ხდება სინთეზური მეტამფეტამინის წარმოების მთავარი „ლაბორატორიაც“. საწარმოო ნედლეული ისევ და ისევ ჩინეთიდან მოედინება. თანაც, ეს ბევრად მარტივია, რადგან, თუ ერთი კილოგრამი ბუნებრივი მეტამფეტამინის წარმოებას 200 კილო ეფედრა სჭირდება, ხელოვნური ნედლეულის მხოლოდ 2 კილოგრამია საჭირო.
21-ე საუკუნის დასაწყისში, როდესაც ტალიბანებმა პირველად მოახერხეს ოპიუმის კრიზისის შექმნა, ფენტანილის ჩანაცვლებით გამოწვეული კატასტროფა ყველაზე თვალსაჩინოდ ესტონეთში გამოვლინდა, სადაც ახალგაზრდების სიკვდილიანობა მკვეთრად გაიზარდა. ამჟამად ეს პროცესი უკრაინაში მიმდინარეობს, სადაც ომის გამო ჰეროინით მომარაგება ისედაც გართულებული იყო და ფენტანილის დანამატები უკვე სერიოზულად დომინირებს.
ეს არის მოკლე დასკვნა, რომლის გაკეთების საშუალებასაც იძლევა ორი გიგანტური ქვეყნის პრეზიდენტის შეხვედრის ანალიზი.
მკითხველს შეუძლია თავად წარმოიდგინოს რა საშიშროება იკვეთება საქართველოსათვის; ერთი მხრივ ჩინეთთან ურთიერთობების ლიბერალიზაციით, რაც ამერიკა-ევროპაში დაბლოკილი ფენტანილის არალეგალურ ნედლეულს უფრო ხელსაყრელი ლოკაციისათვის გამოათავისუფლებს და მეორე მხრივ ოპიუმ-ჰეროინის დეფიციტის უმკვეთრესი გამწვავებით. მახაჩყალა-თბილისის რეისის დაფუძნებაც ალბათ სრულიად შემთხვევით დაემთხვა ზემოაღნიშნულ მოვლენებს ...
ვინ იცის ...

დასაკრავი სია: ზურაბ გურული. პოლიტიკური საუბრები