რუსთავი-2. ამერიკამ ნიგერიაში სპეცოპერაციით დაარტყა "ისლამურ სახელმწიფოს". 26. 12. 2025

usa, isis

რუსთავი-2. კურიერი. 26. 12. 2025 (21:00)
წამყვანები: ნათია ლაზაშვილი, დავით კაკულია
სიუჟეტის ავტორი: ლუკა ჩლაიძე

დამატებით:
ნიგერიაში მოქმედი "ისლამური სახელმწიფოს" ბანაკები პენტაგონმა სამხედრო ხომალდებიდან გაშვებული რაკეტებით გაანადგურა - გასაიდუმლოებული სამხედრო ოპერაციის დეტალები არ საჯაროვდება.
26. 12. 2025

25 დეკემბერი, შუაღამე, გვინეის ყურე, ვერტიკალური გაშვების სისტემებით აღჭურვილმა სამხედრო-საზღვაო ხომალდმა მიზანში ამოიღო ნიგერიის უკიდურეს ჩრდილო-დასავლეთში მდებარე სოკოტოს შტატი. მედიის ინფორმაციით, სწორედ ამ ტერიტორიაზე განლაგებული იყო "ისლამური სახელმწიფოს" მებრძოლების დისლოცირების ზონა. ტერორისტების ორ ბანაკს აშშ-ის ძალებმა ათზე მეტი "ტომაჰავკის" ტიპის რაკეტა ესროლეს.
გასაიდუმლოებული სამხედრო ოპერაციის შედეგების შესახებ დეტალები ამ დრომდე არ საჯაროვდება, თუმცა აშშ-ის აფრიკის სარდლობის ინფორმაციით იერიში აშშ-ის პრეზიდენტის და ომის მდივნის მითითებით ნიგერიის ხელისუფლებასთან კოორდინაციით განხორციელდა. პენტაგონის პრესრელიზში ნათქვამია, რომ ISIS-ის ბანაკებში რაკეტებს რამდენიმე ტერორისტი ემსხვერპლა.
ნიგერიის რეგიონში განხორციელებული სამხედრო ოპერაციის მიზეზი განმარტა ამერიკის შეერთებული შტატების ომის დეპარტამენტის მდივანმა. პიტ ჰეგსეტმა სოციალურ ქსელში დაწერა, რომ ტერორისტულმა ორგანიზაციამ ქვეყანაში ქრისტიანების დევნა და ხოცვა ჟლეტა უნდა დაასრულოს.
"ისლამური სახელმწიფოს" წინააღმდეგ კონკრეტული ნაბიჯები დონალდ ტრამპმა ჯერ კიდევ ერთი თვის წინ დააანონსა, ამერიკის შეერთებული შტატები ტერორისტული ორგანიზაციის საპასუხოდ ქმედებებს რამდენიმე ვარიანტს განიხილავდა, მათ შორის ნიგერიაში სამხედრო ძალების შეყვანას და ავიადარტყმებს. ტრამპმა დღეს დაწერა, რომ პასუხი გაცემულია.
ტერორისტული ორგანიზაციის წინააღმდეგ მიმართული დარტყმების განხორციელების პროცესში, პენტაგონს ნიგერიის ხელისუფლება დაეხმარა. ოფიციალური აბუჯას განცხადებაში ნათქვამია, რომ ოპერაცია საერთაშორისო სამართლისა და ქვეყნის სუვერენიტეტის დაცვით ჩატარდა.
ამერიკის შეერთებული შტატების ქმედებებს აფასებს ნიგერიის პრესაც. ჟურნალისტებთან ანტიტერორისტული ოპერაციის შესახებ ისაუბრეს ქვეყნის მოქალაქეებმაც.
ნიგერიის ჩრდილო-აღმოსავლეთ ნაწილში მდებარე რეგიონებში შეიარაღებული დაჯგუფებები ცენტრალური ხელისუფლების წინააღმდეგ უკვე 16 წელი იბრძვიან. თავს ესხმიან სოფლებს - რელიგიური მოტივით კლავენ ათასობით ადამიანს და გამოსასყიდის მოთხოვნით მოქალაქეებს იტაცებენ.
https://rustavi2.ge/ka/news/335781

დასაკრავი სია: პოლიტიკური მასალები სხვადასხვა მედიიდან